El Vikipedio

"Komunumaro" en Germanio estas administra unuo, kiu grupigas plurajn etajn komunumojn, por komune plenumi difinitajn taskojn. La koncepto tiamaniere grupigi unuopjn komunumojn por difinitaj kunaj taskoj nur ekzistas en 9 el la entute 16 federaciaj landoj.

[redakti] Diversaj nacilingvaj nomoj laŭ la unuopaj federaciaj landoj

• En Malsupra Saksio la administra strukturo germanlingve nomiĝas Samtgemeinde [prononco Zámtgemajnde] (de "gesamt" = kune / komune, kaj "Gemeinde" = komunumo, do iusence - lingve iom duoble - tradukeblus "komuna komunumo").
• En Rejnlando-Palatinato temas pri Verbandsgemeinde [prononco Ferbántsgemajnde], "liga komunumo",
• en Baden-Virtembergo, Bavario, Turingio kaj Saksio-Anhalto pri Verwaltungsgemeinschaft [prononco Ferváltungsgemajnŝaft], "administra komunaĵo",
• kaj en Brandenburgio, Meklenburgio-Antaŭpomerio kaj Ŝlesvig-Holstinio simple pri la vorto Amt, "oficejo".

[redakti] Taskoj

Komunumaro havu minimuman nombron da enloĝantoj, en Malsupra Saksio ekzemple almenaŭ 7.000. Inter la taskoj de la komunumaroj estas inter alie la kolekto de uzita akvo kaj la organizado de tombejoj kaj fajrobrigadoj. La komunumaroj ankaŭ konstruas kaj prizorgas la lokajn elementajn lernejojn, la interkomunumajn stratojn, la lokajn bibliotekojn, sportejojn kaj pliajn publikajn instalaĵojn. Eblas interkonsenti pri pliaj taskoj, ekzemple pri komuna turisma varbado.